بنات كتيرة بيسألوني عن فرد الشعر، وأنا زي ما قلت كتير مابانصحش أي بنت إنها تفرد شعرها بأي وسيلة؛ لأنها بتكون مدمّرة للشعر. ولكن فيه بنات -خصوصا المقبلين على الزواج- بيكونوا مصممين إنهم يفردوا شعرهم عل
شان يكون شكله حلو بعد الزواج، وفي الحالة دي ممكن إنها تلجأ لفرد شعرها بوسائل معينة، ولكن أنا ما بانصحش إنها تعتمد على نفسها في الموضوع ده، وتجيب كريم وتعمله لشعرها بنفسها، ولكن تلجأ لمتخصصين في فرد الشعر. وده كمان هيبقى مجهِد جدا للشعر؛ لأنه بيخلّي استجابة الشعر لأي علاج ضعيفة جدا، وبيخلّي تجعيدات الشعر تزيد بنسبة أكبر، وعلشان كده الفرد ده بنستعمل معاه شامبوهات وحمامات كريم معينة، ومش هنقدر نعمل ماسكات طبيعية؛ لأن فيه بعض المواد هتكون مضرّة للشعر في الحالة دي. بالنسبة للكرياتين عايزة أعرفكم إن ده مادة طبيعية داخلة في تكوين الجسم، بتدّي نعومة وتقوية للشعر وكمان للأظافر، وفيه متخصصين استخلصوا الكرياتين ده من مواد معينة ولكنها حرّمت دوليا، ويعتبر أفضل أنواع الكرياتين هو الكرياتين البرازيلي، ولكن الكرياتين ده بيكون معالج للشعر، أما الكرياتين الفرد بيكون عبارة عن مجموعة من المواد الكيماوية، ومضاف لها نسبة من الكرياتين علشان تدي الحيوية للشعر. والكرياتين الطبيعي ده بيكون شكله سائل لزج، ولونه أغمق شوية من العسل النحل، وبيكون مش متوفّر أوي، وسعره غالي حوالي 200 جنيه لأمبولة حجمها 5 أو 10 مل، وده بيفيد الشعر جدا وبيدّي له بريق وحيوية نعومة. والأمبولات دي بناخد منها مل واحد ونخلطه بمية ونعمله زي حمام كريم للشعر ونشطفه بعد دقائق، ولكن أنا بافضل إننا نلجأ لمتخصصين لأننا مش هنعرف شكل الكرياتين الأصلي.
